கேள்வி-பதில் (06.11.2026)

 

கேள்வி-பதில்

1. கேள்வி: "நான் முதல்வரிடம் சொன்னேன். நீங்க வாரத்துல ஒரு நாள் பட்டு வேட்டி, சட்டை கட்டி வரும்போது பார்க்கவே கண்ணுக்கு அப்படி இருக்குணா. இடமே கல்யாண வீடு மாதிரி இருக்கு.  அதேபோல தமிழகம் முழுவதும் தலைமைச் செயலகம் உள்ளிட்ட அனைத்து அரசு அலுவலகங்களிலும் வாரம் ஒரு நாள் அமைச்சர்கள் மற்றும் அதிகாரிகள் வேட்டி, சட்டை அணிந்து வர நடவடிக்கை எடுக்க வேண்டும் என முதல்வரிடம் கோரிக்கை வைத்தேன். இதற்கான ஏற்பாடுகளைச் செய்ய முதல்வர் உத்தரவிட்டார். இனி அனைத்து அரசு அலுவலகங்களிலும் வாரத்தில் ஒருநாள் மரபாடை தினம் முதல்வர் உத்தரவின் பெயரில் நடைமுறைக்கு வர இருக்கிறது" என்று அமைச்சர் ராஜ்மோகன் பேசி இருக்கிறாரே?   பதில்: பஸ் டிரெய்னில் அவசரமாக ஏறி இறங்குவது, மோட்டார்சைக்கிள் ஓட்டுவது, ஆகிய செயல்களுக்கு வேட்டி சிரமமான உடை. அந்த உடையில் கார் ஓட்டுவதும் ரிஸ்க்கானது. வேட்டி சட்டை அணிந்து முதல்வர் விஜய் இந்த வேலைகள் செய்வதில்லை. இதுபோக, தமிழக ஆண்களுக்கு மேல் சட்டை பாரம்பரிய உடையும் அல்ல. அது வெளிநாட்டவர் அறிமுகப் படுத்தியது, தற்காலத்தில் உபயோகமாக இருக்கிறது.   காக்கா பிடிக்கும் கலையில் ராஜ்மோகன் அசத்துகிறார். முதல்வரும் ரசிக்கிறார்.

2. கேள்வி: இந்திய-அமெரிக்க தொழில் கூட்டுறவு, அதானி விவகாரம் மற்றும் பிரதமர் மோடியின் அயலகத் தொடர்பு குற்றச்சாட்டுகள் பற்றிப் பொதுவெளியில் தம்முடன் விவாதிக்க மோடியை மீண்டும் சவாலாக அழைக்கிறாரே காங்கிரஸ் தலைவர் ராகுல் காந்தி?   பதில்: ஒருவர் தனது முதல் முயற்சியில் ஐ.ஐ.டி என்ஜினியரிங், எம்.பி.ஏ மற்றும் ஐ.ஏ.எஸ் பரீட்சைகளில் அடுத்தடுத்து வெற்றி காண்கிறார். அவருக்குத் தெரிந்த இன்னொருவர், பெரிய படிப்பு படிக்க ஆசைப்பட்டாலும் சாதாரண டிகிரி முடிக்கவே திணறுகிறார். அப்படியானால், முதலாமவர் பரீட்சைகளுக்கு எவ்வாறு தயாராகிறார் எனத் தெரிந்துகொண்டு இரண்டாமவர் பயனடைய நினைப்பது தானே புத்திசாலித்தனம்? பெயில் ஆகிறவர் ஜெயித்தவரைப் பார்த்து உதார் டயலாக் பேசினால் அதுவா வெல்லும் வழி?   2014, 2019 மற்றும் 2024 லோக் சபா தேர்தல்களில் பாஜக கூட்டணிக்குத் தலைமை ஏற்று மூன்று முறையும் வென்று பிரதமர் ஆனவர் நரேந்திர மோடி. அந்தத் தேர்தல்களுக்கு முன்னர் ராகுல் காந்தியைப் பார்த்து "ஏய்! ஒண்டிக்கு ஒண்டி என்னோடு மேடையில் விவாதம் செய்ய முடியுமா?" என்று மோடி கேட்டாரா? சமர்த்து இருந்தால் வென்றவரைப் பார்த்து ராகுல் காந்தி கற்கலாம்.

3. கேள்வி: 'நீட் தேர்வு வேண்டாம் என்று மத்திய அரசின் குழுவிடம் தமிழக முதல்வர் விஜய் திட்டவட்டம். உயர்கல்விச் சேர்க்கைக்காக நடைபெறும் நீட் அல்லது நீட் போன்ற தேர்வுகள் நடத்தப்படுவதற்கு தமிழக அரசின் சார்பாக எதிர்ப்பு' என்று செய்திகள் வருகின்றனவே?   பதில்: விஜய்யின் இலக்கு தன்னை ஆட்சியில் ஸ்திரப்படுத்துவது, நீண்டகாலம் முதல்வராக நீடிப்பது, திமுக மற்றும் அதிமுக-வை அடக்கியே வைத்திருப்பது, அதற்காக சாதாரண மக்களுக்கு அரசு கஜானாவிலிருந்து அள்ளிக்கொடுத்து அவர்களை குஷியில் வைத்திருப்பது. மற்றபடி, ஆட்சியில் திமுக செய்த சில தவறுகளைச் செய்யாமல், அவற்றில் மாட்டிக் கொள்ளாமல், இருக்க நினைக்கிறார் விஜய்.   உயர்கல்வி மற்றும் மக்களின் வாழ்வைத் தொடும் பல துறைகளில் திறமைக்கு மதிப்பும் ஊக்கமும் அளித்து சமூகத்தை மேம்படுத்துவது, விஜய்யின் நோக்கமல்ல. அதற்கான தன்னலமற்ற சிந்தனையும் தொலைநோக்குப் பார்வையும் அவரிடம் இல்லை. சாதாரண மக்கள் அவரை சினிமாக் கதாநாயகன் மாதிரி கண்விரிக்கப் பார்த்து மோகித்தால் அவருக்கு அதுவே திருப்தி.   திறமையின் அடிப்படையில் பரவலாக நிகழும் மக்களின் முன்னேற்றம், சுயசார்பு நிலை மற்றும் சுய கௌரவ உணர்வு, விஜய் மீதான அவர்களது மோகத்தைக் குறைக்கலாம். ஆகையால் திறமையை அடையாளம் கண்டு ஊக்குவிக்கும் நீட் மாதிரியான தேர்வுகள் விஜய்க்கு அலர்ஜி என்று தோன்றுகிறது. வேறுவேறு காரணங்களுக்காக, இந்த விஷயத்தில் திமுக-வும் தவெக-வும் ஒண்ணு.

4. கேள்வி: "பள்ளிக்கு ஒழுங்காகத் தலைமுடி வெட்டி வராத மாணவர்களுக்கு மொட்டை அடியுங்கள்" என, சமூக நலத்துறை அமைச்சர் ஜெகதீஸ்வரி ஒரு அரசுப் பள்ளி விழாவில் பேசியிருக்கிறார். அவர் அறிவுரை வரவேற்கத் தக்கதா?   பதில்: முதல்வர் விஜய்க்கு அடர்த்தியான ஸ்டைலான தலைமுடி இல்லாமல் போனால், அமைச்சரின் மெசேஜ் புரிந்துகொள்ளத் தக்கது.  சட்டசபையிலும் பொதுவெளியிலும் அங்கிள் விஜய் தூக்கலான டிரேட் மார்க் தலைமுடியுடன் வரும்போது - சிறுவயது மற்றும் இளவயதினர் பலரை விஜய்யின் தலைமுடியும் வசீகரிக்கும் போது - அமைச்சரின் கண்டனம் அவரே அறியாமல் மொட்டைத் தலைக்கும் முதல்வர் தலைக்கும் கூட முடிச்சுப் போடுகிறது.

5. கேள்வி: ராகுல் காந்தி சொல்லும் 'ஓட்டுத் திருட்டு' என்றால் என்ன?   பதில்: உதவாக்கரையின் உருட்டு.

பகுதி 151 // 06.11.2026

- ஆர். வி. ஆர் – Author: R. Veera Raghavan, Advocate, Chennai blog address: rvr-india.blogspot.com email: veera.rvr@gmail.com

கேள்வி-பதில் (03.11.2026)

 

கேள்வி-பதில்

1. கேள்வி: "மோடி அவர்களே, நீங்கள் வெளிநாட்டு உதவியுடன் பிரதமர் ஆனீர்கள். வெளிநாட்டு உதவியுடன் அந்தப் பதவியில் நீடிக்கிறீர்கள். உங்கள் நிதி அமைப்பை வெளிநாட்டினர் ஆதரிக்கிறார்கள், கட்டுப்படுத்துகிறார்கள். அயலக சோஷியல் மீடியா உங்களுக்குப் பக்கபலமாக இருக்கிறது. இது பற்றிப் பொதுவெளியில் நாம் விவாதிக்க சவால் விட்டு உங்களை அழைக்கிறேன். தில் இருந்தால் வாருங்கள்" என்று லோக் சபா எதிர்க்கட்சித் தலைவர் ராகுல் காந்தி எக்ஸ் தளத்தில் பதிவிட்டிருக்கிறாரே?   பதில்: ரூட்டை மாற்றுகிறார் ராகுல் காந்தி. முன்னதாக, ஒட்டுத் திருட்டு மூலம் பாஜக அதிக எம்.பி தொகுதிகளில் வென்று மோடி பிரதமர் ஆகிக் கொண்டே இருக்கிறார் என்றாரே ராகுல்? அதற்காகத் தற்போதைய தலைமைத் தேர்தல் கமிஷனராக இருக்கும் ஞானேஷ் குமார் மோடிக்கு உதவி செய்தார் என்றும் சொன்னாரே ராகுல்?   பாவம், ராகுல் காந்தி. 56 வயதிலேயே ஞாபகக் குறைவு ஏற்பட்டு மோடி பிரதமர் ஆன காரணம் குறித்து முன்னர் என்ன குற்றச்சாட்டு வைத்தோம், இப்போது மாறுதலாக என்ன சொல்கிறோம், என்பது புரியாதவர் ஆகிவிட்டாரா?   பைத்தியத்துக்கு வைத்தியம் உண்டு. ராகுலியத்துக்குக் கிடையாது.

2. கேள்வி: இயல் இசை நாடக மன்றத்தின் புதிய தலைவராக நியமிக்கப் பட்டிருக்கும் புஷ்பவனம் குப்புசாமி, முதல்வர் விஜய்யைப் புகழ்ந்து அமைச்சர்கள் முன்னிலையில் பாட்டுப் பாடியிருக்கிறாரே?   பதில்: தன்னைச் சுற்றி இருப்பவர்கள் பொதுவெளியில் தன்னைப் புகழ்ந்தால் தனக்கு இனிக்கும் என்ற உணர்வை அவர்களுக்கு அளிக்கிறார் விஜய். அதை நன்றாகப் புரிந்துகொண்டவர் சபாநாயகர் ஜே.சி.டி பிரபாகர் மற்றும் மாநில அமைச்சர்கள். புஷ்பவனம் குப்புசாமியும் சளைக்கவில்லை.   விஜய் ஆசைப்படாமல் அரசுப்பணி தொடர்பானவர்கள் விஜய் புகழ் பாட மாட்டார்கள். விஜய்யின் இந்த சினிமா வழி ஆசை, முனைப்பான திறமையான நிர்வாகத்தை ஊக்குவிக்காது.

3. கேள்வி: "பாலியல் வன்கொடுமை, சட்டம்-ஒழுங்கு பிரச்சனை, மின்வெட்டு உள்ளிட்டவை கடந்த ஐந்து மாதங்களில் தான் உள்ளதாக நினைக்கக் கூடாது. இந்தப் பிரச்சனைகள் கடந்த ஆட்சிகளிலும் இருந்தன" என்று மதிமுக-வின் முதன்மைச் செயலர் துரை வைகோ, தவெக-வுக்கு ஆதரவாகக் கருத்து தெரிவித்திருக்கிறாரே?   பதில்: தற்போது தவெக தலைமை தாங்கும் ஆட்சிக்குத் தான் மதிமுக ஆதரவு அளித்து வருவதாக நினைக்கக் கூடாது. தீய சக்தி என்று விஜய் வர்ணித்த திமுக-வின் முந்தைய ஆட்சிக்கும் மதிமுக-வின் முழு ஆதரவு இருந்தது - இதையும் சேர்த்து துரை வைகோ சொல்லட்டும்.

4. கேள்வி: திமுக பொதுச் செயலர் துரைமுருகனின் பேத்தி திருமணம் புரோகிதர்கள் முன்னிலையில் வேத மந்திரங்கள் முழங்க நடைபெற்றது. இதுபற்றிக் கருத்து சொன்ன திராவிடர் கழகத் தலைவர் கி. வீரமணி, "புரோகிதத் திருமணம் என்றால், 'ஸ்டாலின் தலைமையில்' என்று ஏன் அழைப்பிதழ்? துரைமுருகன் இல்ல புரோகிதத் திருமணம் திமுக-வுக்கும் அதன் தலைவருக்கும் இழுக்கல்லவா?" என்று கேட்டிருக்கிறாரே?   பதில்: வீரமணி, உண்மையான பகுத்தறிவு இல்லாமல் பேசுகிறவர் மட்டுமல்ல; ஒரு திருமண நிகழ்ச்சி நடந்து முடிந்தவுடன், மகிழ்வுடன் வாழ்க்கையில் இணைந்த மணமக்கள் காதுகளில் விழும்படி  இங்கிதமே இல்லாமல் அந்த நிகழ்ச்சி குறித்து கருத்து சொல்பவரும் கூட.   பொல்லாங்கும் போலித்தனமும் மிக்கவர் வீரமணி. அந்த குணங்கள், திராவிடப் பகுத்தறிவின் அம்சங்கள்.

5. கேள்வி: "அமைச்சர் ராஜ்மோகன் அசைவ உணவை விரும்பிச் சாப்பிடுபவர். ஆனால் அரசுப் பள்ளி மாணவர்களுக்கு எப்போது சிக்கன் பிரியாணி போடப்படுமோ, அதுவரை அசைவம் சாப்பிட மாட்டேன் என்ற உறுதியுடன் அவர் இருக்கிறார். இப்போது அவர் சைவ உணவு மட்டுமே சாப்பிடுகிறார்" என்று தமிழ்நாடு பாடநூல் கழகத் தலைவர் லயோலா மணி ஒரு விழா மேடையிலிருந்து சொல்லி இருக்கிறாரே?   பதில்: "அரசுப் பள்ளி மாணவர்களுக்குத் தரமான வகுப்பறைகள் மற்றும் உள்கட்டமைப்பு வசதிகள் கிடைக்கும் வரை எனக்கு அலுவலகத்தில் ஏசி அறை வேண்டாம், மர பெஞ்சில் உட்கார்ந்து பைல்கள் பார்ப்பேன், மின்விசிறியைத் தவிர்த்து  கைவிசிறியில் காத்து வாங்குவேன்" என்றும் ராஜ்மோகன் சொல்லட்டுமே? அரசுப் பள்ளி மாணவர்களுக்கு நல்ல வகுப்பறைகள், சுகாதாரமான கழிவறை வசதிகள், சிறந்த ஆசிரியர்கள் - அத்துடன் மாணவர்கள் பள்ளி சென்றுவர விசேஷ பஸ்கள் - முதலில் முக்கியமா, அந்த மாணவர்கள் சிக்கன் பிரியாணி சாப்பிடுவது முதலில் முக்கியமா?

பகுதி 150 // 03.11.2026

- ஆர். வி. ஆர் – Author: R. Veera Raghavan, Advocate, Chennai blog address: rvr-india.blogspot.com email: veera.rvr@gmail.com

கேள்வி-பதில் (01.11.2026)

 

கேள்வி-பதில்

1. கேள்வி: "அரசியல் காரணங்களால்தான் நான் தற்போது சிறையில் இருக்கிறேன்" என்று 100 கோடி ரூபாய் மோசடி வழக்கில் கைதான முன்னாள் திமுக அமைச்சர் அன்பில் மகேஷ் கூறி இருக்கிறாரே?   பதில்: அவர் மீதான குற்றச்சாட்டுகள், அவரைக் கட்டுப்படுத்தும் அரசியல் சக்திகளுக்குச் சம்பந்தம் கொண்டதாக இருக்கலாம் - அவற்றின் பங்கு என்ன ஏது என்று அவருக்குத் தெரியும், நமக்குத் தெரியாது. ஆகையால் அவர் கைதும் சிறை வாசமும் அரசியல் காரணங்களால் ஏற்பட்டது என்று - சில அரசியல் தலைவர்களின் நடவடிக்கையின் விளைவாக ஏற்பட்டது என்ற ஒரு அர்த்தத்தில் - அவர் பேசி இருக்கலாம். அவர் யாரை நினைத்து என்ன அர்த்தத்தில் பேசினார் என்பது அவருக்குத்தான் தெரியும், நமக்குத் தெரியாது.

2. கேள்வி:  லோக் சபா எதிர்க்கட்சித் தலைவர் ராகுல் காந்தி, காங்கிரஸ் கட்சியின் தேசியத் தலைவர் மல்லிகார்ஜுன கார்கே ஆகிய இருவரும் பிரதானமாக முன்னிலை வகிக்க, இண்டி கூட்டணிக் கட்சிகள் தலைமைத் தேர்தல் கமிஷனர் ஞானேஷ் குமாரை 'பொதுவெளிப் பதவி நீக்கம்' (public impeachment) செய்திருக்கிறார்களே?   பதில்:  கழைக் கூத்தாடிகள், பலரும் சேர்ந்து பார்க்கக் கூடிய பொதுவெளியில் தான் அந்தர் பல்டி அடித்து வித்தை காட்டிக் கூடி இருப்பவர்களை மகிழ்விப்பார்கள். பொதுவெளி வித்தையில் அவர்களுக்குப் பிழைப்பு நடக்கும். பார்வையாளர்களுக்கும் பொழுது போகும்.

3. கேள்வி: பிரதமர் மோடி, உள்துறை அமைச்சர் அமித் ஷா மீது காங்கிரஸ் தலைவர் ராகுல் காந்தி ஏன் கடும் வெறுப்பைக் காண்பிக்கிறார்?   பதில்: ராகுல் காந்திக்கு 56 வயது. அவரது நெடுநாள் குறி இந்தியாவின் பிரதமர் ஆவது. 2029-ல் அடுத்த லோக் சபா தேர்தல் நடக்கும்போது அவர் வயது 59 ஆகும். அந்த வருடமும் அவர் பிரதமராகும் வாய்பில்லை என்று அவரது உள் மனம் சொல்லும். அவருக்கான அடுத்த சான்ஸ் 2034-ல், அவருடைய 64-வது வயதில். அப்போது கிடைத்தாலும் அந்தப் பதவியை ஏற்க அவர் தயார் தான். ஆனால் 2034 வரை ராகுல் காந்தியே கதி என்று காங்கிரஸ் கட்சி கிடக்குமா என்பது நிச்சயமல்ல. நாள் ஆக ஆக, சகோதரி பிரியங்கா காந்தியும் அவருடைய மகனும் கூட தன்னை ஓரம்கட்டிவிட்டு கட்சிக்குள் தலையெடுப்பார்களோ என்ற பயமும் ராகுல் காந்திக்குள் ஒளிந்திருக்கும். இதையெல்லாம் தாண்டி 2039 வரை, அதாவது ராகுல் காந்தியின் 69-வது வயது வரை, பிரதமராகத் காத்திருக்கும் நினைப்பே அவரைக் கிறுகிறுக்க வைக்கும்.   இவ்வாறு காங்கிரசுக்கு வெளியில் தனது மதிப்பைப் பூஜ்யம் ஆக்கி, மத்தியில் கூட்டணி அரசிலாவது காங்கிரஸ் பங்கு பெறும் வாய்ப்பைத் தொடர்ந்து நொறுக்கி, இந்திரா காந்தியின் பேரனான தன்னுடைய பிரதமர் கனவைச் சிதைத்து வரும் மோடி மற்றும் அமித் ஷா மீது ராகுலுக்கு வெறுப்பு ஏற்படத்தானே செய்யும்?

4. கேள்வி: "தமிழ்நாட்டுக்காக, தமிழை முதன்மைப்படுத்தி ஒரு கொடியை உருவாக்க வேண்டும். தமிழ்நாட்டிற்கு தனிக் கொடி தேவை" என்று தமிழக வெற்றிக் கழக அமைச்சர் ஆதவ் அர்ஜுனா பேசியிருக்கிறாரே?   பதில்: கொடியின் நடுவில் 'வெற்றித் தமிழ்' என்ற வாசகமும் தோன்ற வேண்டுமா?   ஆதவ் அர்ஜுனாவின் அசட்டுப் பேச்சை முதல்வர் விஜய் கண்டிக்காவிட்டால், அர்த்தம் இதுவாக இருக்கலாம்: கட்சியின் அடுத்த கட்டத் தலைவர் மூலமாக விஜய் ஒரு வில்லங்கமான யோசனையை நழுவ விட்டுப் பார்க்கிறாரோ? ஒன்றும் சொல்வதற்கில்லை.

5. கேள்வி: "மீண்டும் உலகத் தமிழ் மாநாடு இந்தத் தமிழ் மண்ணில் தொடங்கி உலகம் முழுவதும் பிரம்மாண்டமாக நடத்தப்படும்" என்று தமிழக அமைச்சர் ராஜ்மோகன் கூறி இருக்கிறாரே?   பதில்: திராவிட அரசியல் கட்சித் தலைவர்களுக்கு உலகத் தமிழ் மாநாடு நடத்துவது, பட்டாசு வெடிப்பது மாதிரி. அவர்களின் நோக்கம் பட்டாசைப் போற்றுவது அல்ல; வெடிச் சத்தம் கேட்டு மகிழ்வது. முன்பு அடுத்த வீட்டுக்காரன் வைத்த பட்டாசை விட, தற்போது தன்னுடைய பட்டாசு பெரிதாக வெடிக்க வேண்டும் என்பது அவர்களின் ஆசை.

பகுதி 149 // 01.11.2026

- ஆர். வி. ஆர் – Author: R. Veera Raghavan, Advocate, Chennai blog address: rvr-india.blogspot.com email: veera.rvr@gmail.com