கேள்வி-பதில் (30.10.2026)

 

கேள்வி-பதில்

1. கேள்வி: தலைமைத் தேர்தல் கமிஷனர் ஞானேஷ் குமாரின் ராஜினாமாவைக் கோரும் கரப்பான்பூச்சி ஜனதா கட்சி, "தேர்தல் கமிஷன் மீதான பொதுமக்களின் நம்பிக்கையை மீட்டெடுக்க அவரின் ராஜினாமா அவசியம்" என்று தெரிவிக்கிறது. அந்தக் கோரிக்கைக்கு இந்தக் காரணம் வலுவானதா?   பதில்: ஒரு சின்ன சந்தேகம் தெளிந்தால் இதற்கான பதில் எளிது.   "ஐயா, கரப்பான்பூச்சிகளே! நீங்கள் தான் எங்களின் ஒருமித்த குரல். நாங்களே தேர்தெடுத்த அரசாங்கத்தை நீங்கள் என்ன விமர்சித்தாலும், உங்கள் கோரிக்கை தொடர்பாக உச்ச நீதிமன்றம் என்ன தீர்ப்பு வழங்கினாலும், நீங்கள் போ என்றால் ஒரு அரசு அதிகாரி பதவி விலகிப் போகவேண்டும், அப்போதுதான் அந்தப் பதவியின் மீது எங்களுக்கு நம்பிக்கை இருக்கும். எங்கள் சார்பாக இதை நீங்களே அறிவித்துவிடுங்கள்" என்று கரப்பான்பூச்சி ஜனதா கட்சிக்கு எப்போது பொதுமக்கள் அதிகாரம் கொடுத்தார்கள்?

2. கேள்வி: "கோவை, திருப்பூர், கரூர் மாவட்டங்களில் சாயப்பட்டறைக் கழிவுகளை நொய்யல் ஆற்றில் கட்டுப்பாடின்றிக் கலக்க விடுவது தான் நுரை பெருக்கெடுக்கக் காரணம் என்பதில்லை; அந்த ஆற்றில் நுரை ஏற்பட சோப்பு ஷாம்பு பயன்பாடுதான் காரணம்" என்று மாநில அமைச்சர் ராஜிவ் விளக்கம் சொல்லி இருக்கிறாரே?   பதில்: தமிழகத்தின் பிற பகுதிகளில், வீடுகளின் குளியலறைகளிலிருந்து வெளியேறி சாக்கடைகளில் கலக்கும் நீரில் இப்படி நுரை பொங்குவதில்லையே, அந்தப் பகுதி மக்கள் சோப்புப் போட்டு குளிப்பதில்லையா, ஷாம்புவும் உபயோகிப்பதில்லையா, அங்குள்ள கடைகளில் சோப்பு ஷாம்பு விற்பனை ஆவதில்லையா?

3. கேள்வி: 100 கோடி ரூபாய் கலெக்ஷன் வழக்கில், முன்னாள் திமுக அமைச்சர் அன்பில் மகேஷ் கைதாகிச் சிறையில் அடைக்கப்பட்ட பிறகு, எதிர்க்கட்சித் தலைவர் உதயநிதி அவரை இரண்டு முறை அடுத்தடுத்து சிறையில் சந்தித்துப் பேசி இருக்கிறாரே?   பதில்: போலீஸ் தன்னைக் கைது செய்யப்போவதை எதிர்பார்த்து, பொதுவெளியில் தனது பெயர் கெடப் போகிறதே என்று அன்பில் மகேஷ் பதட்டம் கொண்டிருப்பார். அவர் கைதாகி விசாரணைக்கு உள்ளாகும் போது, திமுக தலைவர் உதயநிதி மேலும் அதிகமாகப் பதட்டம் கொள்கிறார் - கைதான அமைச்சரை வேகவேகமாக இரண்டுமுறை சந்திக்கிறார். உதயநிதியின் கூடுதலான பதட்டமும் இயற்கையானது -  ஏன் அப்படி என்று விவரமானவர்களுக்குப் புரியும்.

4. கேள்வி: அக்டோபர் 31ம் தேதி 'இண்டி' கூட்டணிக் கட்சிகள் டெல்லியில் ஒன்றுகூடி, தலைமைத் தேர்தல் கமிஷனரைப் பொதுவெளியில் பதவி நீக்கம் செய்யும் தீர்மானத்தை ஒரு பாவனையாக நிறைவேற்றப் போகிறார்களாமே?   பதில்: வீட்டிலுள்ள சிறு குழந்தைகள் சமையல் செய்ய முடியாது. சமையல் செய்ய அவர்களுக்கு அதிகாரமும் இல்லை. இருந்தாலும் அவர்கள் சொப்புகளை வைத்து பாவனையாகச் சமைத்து, அவர்களுக்குள்ளேயே பாவனையாகப் பரிமாறி உண்டு மகிழ்வார்கள். பெரியவர்கள் பார்த்து ரசிக்கலாம் - அதுபற்றிக் குழந்தைகளுக்குக் கவலை இருக்காது.   சில அரசியல் குழந்தைகள் ஒன்றுகூடி பாவனையாகத் தலைமைத் தேர்தல் கமிஷனரைப் பதவி நீக்கம் செய்து சந்தோஷப்பட நினைக்கின்றன. நாம் பரிகசிக்கலாம். இந்தக் குழந்தைகளும் கவலைப்பட மாட்டார்கள்.

5. கேள்வி: "நானும் ரஜினியும் பேசியபோது, 2026 சட்டசபைத் தேர்தல் முடிவுகள் குறித்து அவர் என்னிடம் வருத்தப்பட்டார். நீங்களாவது ஜெயித்திருக்கலாம். எனக்கு ரொம்ப கஷ்டம். ரொம்ப வருத்தம்" என்று ரஜினிகாந்த் தன்னிடம் சொன்னதாக, நாம் தமிழர் கட்சித் தலைவர் சீமான் சொல்லி இருக்கிறாரே?   பதில்: நமக்குத் தெரிந்தவருக்கு ஏதாவது இழப்பு ஏற்பட்டிருந்தால், நாகரிகத்திற்காக நாம் அவரிடம் வருத்தம் தெரிவிக்கலாம். அந்த இழப்பு ஒரு தேர்தல் தோல்வியாக இருந்தால், ஜெயித்தவர் தோற்று தோற்றவர் ஜெயித்திருக்க வேண்டும் என்று நாம் விரும்புவதாக அர்த்தமில்லை.   இன்னொன்று: சீமான் சினிமா டைரக்டராக இருந்தவர். புதுப்புது காட்சிகளைக் கற்பனை செய்யத் தெரிந்தவர். ரஜினிகாந்தும் நல்ல நடிகர். அவராகவே ஒரு டைரக்டரின் குறிப்பறிந்து நடிக்கத் தெரிந்தவர். இரண்டில் ஒன்று - நமக்கென்ன தெரியும்?

பகுதி 148 // 30.10.2026

- ஆர். வி. ஆர் – Author: R. Veera Raghavan, Advocate, Chennai blog address: rvr-india.blogspot.com email: veera.rvr@gmail.com

கேள்வி-பதில் (28.10.2026)

 

கேள்வி-பதில்

1. கேள்வி: "உலகத்தைச் சில தலைவர்கள் வென்று காட்டியுள்ளனர். ஆனால் காலத்தை யாராலும் வெல்ல முடியாது. காலத்தை வென்று காட்டியவர், தவெக தலைவர் விஜய் மட்டுமே" என்று வருவாய்த் துறை அமைச்சர் செங்கோட்டையன் கூறி இருக்கிறாரே?   பதில்: விஜய் காலத்தை வென்று காட்டியவரா? காலம் என்றால் 'தேர்தலில் போட்டியிட்ட திமுக' என்றா அர்த்தம்?   விஜய்க்கு நெருக்கமாக இருக்கும் ஆசையில் ஒரு சீனியர் அமைச்சர் பிதற்றித் தள்ளினால் நாம் என்ன செய்வது? தலையில் கைவைத்து முனகலாம்: 'கஷ்ட காலம்!'

2. கேள்வி: "கடந்த இரண்டு ஆண்டுகளில் நடந்த அனைத்து சட்டசபைத் தேர்தல்களையும் ரத்து செய்ய வேண்டும். இனி வரும் அனைத்துத் தேர்தல்களிலும் ஓட்டுச்சீட்டு முறை பின்பற்றப்பட வேண்டும்" என்று காங்கிரஸ் தேசியத் தலைவர் மல்லிகார்ஜுன கார்கே வலியுறுத்தி இருக்கிறாரே?            பதில்: ஜன்னிக் காய்ச்சல் வந்தால் ஒரு மனிதர் ஏதேதோ உளறுவார். பன்னிரண்டு வருடங்களாக மத்தியில் பதவியின்மை என்ற ஜன்னிக் காய்ச்சல், ராகுல் காந்தி கட்டுப்படுத்தும் காங்கிரஸ் கட்சியை வாட்டுகிறது. அதன் அறிகுறி இந்த உளறல். அடுத்த 2029 லோக் சபா தேர்தலிலும் காங்கிரஸ் கூட்டணி தோல்வியுற்றால், மக்களின் விருப்பம் காங்கிரசுக்கு உறைத்த நிலையில் அக்கட்சியைப் பிடித்த ஜன்னி அடங்கலாம். அவ்வாறு காங்கிரஸ் குணமாகட்டும்.

3. கேள்வி: "சர்வதேச அரங்குகளில் காஷ்மீர் பிரச்சனையைத் தொடர்ந்து எழுப்புவதன் மூலம், ஜம்மு-காஷ்மீர் மக்களைப் பாகிஸ்தான் பாதுகாத்து வருகிறது" என்று ஜம்மு-காஷ்மீரின் முன்னாள் முதல்வர் பரூக் அப்துல்லா பேசியிருக்கிறாரே?   பதில்: அரசியலமைப்பு சட்டம் ஆர்டிகிள் 370-ன் பல் பிடுங்கப் பட்டுவிட்டது. ஆகையால் வேறு வழியின்றி பரூக் அப்துல்லா மனதளவில் இந்தியாவுடன் ஒன்றிவிட்டதாகப் பாகிஸ்தான் தீவிரவாதிகள் - அதாவது அவர்களை இயக்கும் அரசு எந்திரம் - நினைக்கலாம். அதன் விளைவாக, பரூக் அப்துல்லாவின் பாதுகாப்புக்கு அச்சுறுத்தல் வரலாம் என்பதால் 'நான் நல்ல பிள்ளை' என்று அவர் பாகிஸ்தானுக்கு உணர்த்துவதற்காக, ஒரு தற்காப்பு உணர்வில், ஏதோ சொல்லியிருப்பார். அவர் கவலை அவருக்கு.

4. கேள்வி: "ஒவ்வொரு தேர்தலிலும் மொத்த ஓட்டுப் பதிவில் பெண்களின் பங்கு 51 சதவிகிதம், ஆண்களின் பங்கு 49 சதவிகிதம். ஆனால் பெண்களுக்கான அதிகாரம், 5 முதல் 10 சதவிகிதம் தான் உள்ளது. எனவே, பெண்களின் கரங்களை உயர்த்தி, அவர்களை முதலாளிகளாக, தொழில் முனைவோராக மாற்ற வேண்டும் என்பதே எங்கள் அமைப்பின் இலக்கு" என்று வீ த லீடர்ஸ் அமைப்பின் தலைவர் அண்ணாமலை கூறியிருக்கிறார். இது சாத்தியப்படுமா?   பதில்: தொழில்துறையில், வியாபாரத்தில், பெண்களுக்கான வாய்ப்புகள் சட்டப்படி  மறுக்கப்படவில்லை. அவர்களின் தன்மைக்கு ஏற்றபடி அந்தத் துறைகளில் பெண்கள் ஈடுபடுகிறார்கள். தேர்தல்களில் ஆண்களின் ஓட்டுப்பதிவு 49 சதவிகிதம் இருப்பதால், வீட்டைக் கவனிப்பது, வளரும் குழந்தைகளைக் கவனிப்பது ஆகிய முக்கிய பணிகளில் அந்த சதவிகித அளவு ஆண்களும் ஈடுபடவேண்டும் என்று ஆண்களின் தன்மைக்கு மாறாக நாம் நினைப்பதில்லை - பெண்களே அவ்வாறு கேட்பதில்லை. மற்றபடி, உரிய பாதுகாப்பும் ஊக்குவிப்பும் அரசிடமிருந்து பெண்களுக்குக் கிடைத்து வரவேண்டும் என்பது அவசியம்.

5. கேள்வி: "கடவுள் ராமர் வனவாசம் சென்றபோது, அவரது செருப்பு அயோத்தியை எப்படி ஆண்டதோ, அதேபோல் ஸ்டாலின் அவிழ்த்து வைத்த செருப்புதான் இன்று தமிழகத்தை ஆட்சி செய்கிறது" என்று திமுக-வின் கொள்கை பரப்பு செயலாளர் திண்டுக்கல் லியோனி பேசி இருக்கிறாரே?   பதில்: தலைவருக்கு ஜால்ரா தட்டவேண்டும் என்றால், அவர் செருப்பை எடுத்தும் தட்டலாம் என்று நிரூபிக்கிறார் லியோனி.

பகுதி 147 // 28.10.2026

- ஆர். வி. ஆர் – Author: R. Veera Raghavan, Advocate, Chennai blog address: rvr-india.blogspot.com email: veera.rvr@gmail.com

கேள்வி-பதில் (25.10.2026)

 

கேள்வி-பதில்

1. கேள்வி: எஸ்.ஐ.ஆர் விவகாரம் பற்றிக் கருத்து தெரிவித்த மதிமுக பொதுச் செயலர் வைகோ, "திமுக-வினரின் மேற்பார்வையில், அவர்கள் விரும்பியபடி, 97 லட்சம் வாக்காளர்கள் நீக்கப் பட்டனர். அதற்கு திமுக-தான் முழுப் பொறுப்பு ஏற்கவேண்டும். அப்போது நாங்கள் அவர்களுடன் கூட்டணியில் இருந்ததால், கூட்டணி தர்மத்தைக் காப்பதற்காக, இதுபற்றிப் பொதுவெளியில் பேசவில்லை" என்று சொல்கிறாரே?   பதில்: 97 லட்சம் நபர்கள் வாக்காளர் பட்டியலில் இருந்து நீக்கப்பட்டது ஒரு திட்டமிட்ட முறைகேடா, அந்த குற்றச்சாட்டிற்கான ஆதாரம் என்ன, என்ற அடிப்படைக் கேள்விகள் இருக்கட்டும்.   இன்னொரு கட்சி தலைமை தாங்கும் கூட்டணியில் மதிமுக அங்கம் வகித்தால், அந்த இன்னொரு கட்சி ஆட்சியில் இருந்தால், தலைமைக் கட்சி என்னவெல்லாம் செய்தால் வைகோ அனைத்தையும் அறிந்து, வாய் மூடி,  கூட்டணிக்கு ஆதரவு தருவார்? அநியாயம், அக்கிரமம், கமிஷன், கலெக்ஷன், கரப்ஷன், கஜானாவைக் காலி செய்தல், சிறுபான்மையினரிடம் பல்லிளித்துத் தாஜா, ஹிந்துக்கள் உணர்வுகளைத் புறக்கணித்தல், என்று எது செய்தாலுமா? அதர்மத்தைக் கட்டிக்கொண்டு நிற்பது ஒரு தர்மமா?   நன்றாக மைக் பிடித்தால் முழுதாக வெட்கத்தை விடலாம் என்று நினைக்கிறார் வைகோ.

2. கேள்வி: "நடிகர் தனுஷுக்கு ஆதரவாக ரஜினிகாந்தே பிரசாரம் செய்தாலும், தனுஷின் அரசியல் வருகை மக்களிடையே எடுபடாது" என்று தவெக அமைச்சர் மரிய வில்சன் கூறி இருக்கிறார். எந்த அடிப்படையில் அவர் இதைச் சொல்கிறார்?   பதில்: ரஜினிகாந்த் இனி அரசியலுக்கு வர நினைக்கவே மாட்டார், தனுஷுக்கு ஆதரவாகப் பிரசாரமும் செய்யமாட்டார், என்பது மரிய வில்சனின் நம்பிக்கை. அதோடு, ஒரு அமைச்சராகத் திறமையுடன் செயல்பட்டு முதல்வர் விஜய்யிடம் பேர் வாங்குவதை விட, விஜய்யின் காது குளிரப் பேசி அவரை மகிழ்விப்பது தன்னால் முடிந்த காரியம் என்று மரிய வில்சன் நினைக்கிறார். முடிந்ததைச் செய்கிறார்.

3. கேள்வி: "2026 சட்டசபைத் தேர்தலுக்கு முன் எஸ்.ஐ.ஆர் நடக்காமல் இருந்தால், தமிழக வெற்றிக் கழகம் 160 சீட்டுகளில் ஜெயித்திருக்கும்" என்று அமைச்சர் நிர்மல் குமார் கூறுகிறாரே?   பதில்: பாஜக-வை எதிர்க்கும் எல்லாக் கட்சிகளும், எஸ்.ஐ.ஆர் இல்லாது போயிருந்தால் அக் கட்சிகள் அதிக எம்.எல்.ஏ தொகுதிகளை வென்றிருப்பார்கள், ஆட்சியையே பிடித்திருப்பார்கள், என்றெல்லாம் சொல்கிறார்கள். எல்லாமாக என்ன அர்த்தம்? எஸ்.ஐ.ஆர் மூலம் ஒரு நபர் வாக்காளர் பட்டியலில் இருந்து நீக்கப்படவில்லை என்றால், அந்த ஒரே ஆள் பாஜக-வைத் தவிர பல எதிர்க்கட்சிகளுக்கு வாக்களித்திருப்பாரா?   இன்னொன்று. நிர்மல் குமார் சொல்வது போல், எஸ்.ஐ.ஆர் நடத்தப் படாமல் தமிழக சட்டசபைத் தேர்தல் நடந்திருந்தால் விஜய் கட்சி 108-க்குப் பதில் 160 சீட்டுகள் வென்றிருக்கும் என்றால் அர்த்தம் இப்படிப் போகிறது: தேர்தலின் போது திமுக அணியில் இருந்து தவெக-வை எதிர்த்துப் போட்டியிட்டு, தேர்தலுக்குப் பின் அணி மாறி தவெக-வுடன் கைகோர்த்து அமைச்சர் பதவிகளைப் பெற்றிருக்கும் காங்கிரஸ், விசிக மற்றும் முஸ்லிம் லீக் கட்சிகள் எஸ்.ஐ.ஆரின் துணையுடன் அநியாயமாகச் சில எம்.எல்.ஏ தொகுதிகளில் வென்று அங்கெல்லாம் தவெக-வின் வெற்றியைத் திருடி இருக்கிறார்கள். நிர்மல் குமார் விடும் உள்குத்துகள் கூட்டணிக் கட்சிகளுக்குப் புரிந்தால் சரி.

4. கேள்வி: கரப்பான்பூச்சி ஜனதா கட்சி நடத்தி வரும் போராட்டம் தொடர்பாகக் கைதாகிச் சிறை சென்று விடுதலையான சவுரவ் தாஸ் மற்றும் அசுதோஷ் ரங்காவைக் குறிப்பிட்டு, "அவர்கள் என்னை விடச் சிறந்தவர்கள் மட்டுமல்ல, என்னை விட மிகமிகப் பெரிய தலைவர்கள்" என்று அக்கட்சியின் நிறுவனர் அபிஜித் திப்கே கூறி இருக்கிறாரே?   பதில்: கரப்பான்பூச்சி ஜனதா கட்சியின் போராட்டங்கள் மக்களிடம் பெரிதாக எடுபடவில்லை. முன்புபோல் போலீசும் போராட்டங்கள் நடக்கையில் பூச்சிகளிடமிருந்து தள்ளி நின்று கிடைக்கிற அடியை வாங்கிப் போகத் தயாரில்லை. தடையை மீறிப் போராட்டம் நடத்துபவர்களைப் போலீஸ் கைது செய்கிறது. இந்த நிலையில், அவ்வாறு போராட்டம் நடத்த முயன்று கைதாகி ஜெயிலுக்குப் போகிற நபர்களை போற்றிப் புகழ்ந்தால்தான், பூச்சி கட்சி உயிர்ப்புடன் இருக்கும், இளைஞர்களை ஈர்ப்பதில் தொய்விருக்காது, பிழைப்பும் நடக்கும், என்று அபிஜித் திப்கே நினைத்திருப்பார்.

5. கேள்வி: காங்கிரசைச் சேர்ந்த தமிழக அமைச்சர் ராஜேஷ் குமார், "தமிழகத்தில் இரண்டு அமைச்சர்கள் கிடைத்து விட்டதற்காக நாங்கள் திருப்தியடையவில்லை. காங்கிரஸ் கட்சியை வலுப்படுத்தி வருகிறோம். தமிழகத்தில் காமராஜர் ஆட்சி அமைப்பதே எங்கள் கனவு" என்று கூறி இருக்கிறாரே?   பதில்: காமராஜர் மாதிரி ஒரு எளிமையான, நேர்மையான, உறுதியான தலைவர் ஆட்சிக்குத் தலைமை தாங்காமல், அல்லது பக்கபலமாக இல்லாமல், காமராஜர் ஆட்சி அமைக்க முடியாது. இன்றைய காங்கிரஸ் கட்சியில் இன்னொரு காமராஜர் உருவாக முடியாது, உருவாகவும் விடமாட்டார் ராகுல் காந்தி. விஷயம் க்ளோஸ்.

பகுதி 146 // 25.10.2026

- ஆர். வி. ஆர் – Author: R. Veera Raghavan, Advocate, Chennai blog address: rvr-india.blogspot.com email: veera.rvr@gmail.com